أنا مصري مليش ملة!!
بقلم : أجمد عزت زيادة الجورنالجي: ملة أبوك إيه؟
: إخواني
: وانت ملة مامي إيه؟
: سيساوي؛ وانت؟!
: أنا مصري مليش ملة!!
أنا اللي نزلت في 25 يناير ورفضت مبارك والعادلي، وقلت للمجلس العسكري ارجع مكانك، متحكمنيش..
أنا اللي رفضت شفيق امتداد مبارك ومرشحتش مرسي الاستبن بتاع الجماعة.. أنا اللي رفض حكم الإخوان.. أنا اللي نزل في ثورة 30 يونيو عشان تمشي الجماعة الإرهابية وتتحاكم.. أنا اللي فوضت السيسي لمواجهة الإرهاب وحمايتي وحماية الأرض والعرض.
أنا اللي رشحت السيسي رئيس وتبنيت الدفاع عنه كرئيس مدني ترك عمله العسكري وجه بإرادة شعب.
أنا اللي استنيت سنتين وأكتر عشان أشوف مصر هتبقى ازاي، وأنا هعيش ازاي مع المشاريع العملاقة والاستثمارات الهائلة وفلوس المؤتمر الاقتصادي ودخل قناة السويس الجديدة، ومشروع المليون فدان.
أنا اللي وقفت أقول: اضرب يا سيسي الإرهاب.. احمي الأرض، واحنا صابرين جنبك.
طهر الإعلام، واقضي على رجال أعمال مبارك، وموت الظلم والفساد، فلقيت زند بيروح على أي حد يتعرضله!!
لقيت تقارير فساد الدولة اترعشت لمة شافتها وبتحاكم المسؤول عن كشفها. لقيت أرض في بلدي بتروح لبلد تانية بين يوم وليلة وعيني عينك، وبيتقال انها مش بتاعتنا، وانت قلت مش عايز كلام في الموضوع ده تاني، رغم ان أنا انتخبتك لأنك قلت انك شفاف ومعندكش اللي تخبيه.
لقيت حكومة بتطعن في حكم قضائي عشان يثبتوا ملكية أرض في مصر لدولة تانية، ومحامي بيقول علينا دولة مفترية احتلت أرض السعودية ودلوقتي بنرجعها!!
طيب في دولة محتلة كل السنين دي، ترجع الأرض اللي محتلاها بالسهولة دي؟!!
مركز مجدي يعقوب ومستشفى 57 بيعالجوا المصريين، وجمعية رسالة بتلبسهم، ومصر الخير بتشغلهم، وبنك الطعام بيأكلهم.. طيب فينك وفين الحكومة؟!!
لا الأمن متأمن، ولا الجنيه متأمن، ولا الطيارات متأمنة، ولا مياه النيل متأمنة، ولا الأرض متأمنة، ولا ولادنا في الشرطة والجيش متأمنين.. أومال ايه اللي متأمن؟!
كل ده ولمة أرجع أتناقش مع حد، أقوله قطر بنت كلب أو تركيا داعمة الإرهاب؛ يرفع حاجب ويقولي:
"ازاي مش بتدعم قطر وتركيا مع كل اللي انت لسة قايله من كام سطر؟!!".. يكمل بدهشة: "هوة مش انت إخوان؟!".
- ليه بتقول كدة؟!
- كل الانتقادات اللي فاتت دي ومش إخوان؟!!
- لأ طبعا.. يلعن أبو الإخوان.. ربنا ينتقم منهم.
- إزاي بتنتقد الرئيس أو الحكومة أو البرلمان ومش إخوان؟!!
- عادي
- ممم.. يبقى انت سيساوي.. لأنك شتمت قطر وتركيا.
- مش شرط!
- أومال ملة والدة حضرتك إيه؟!!
- أقولك ومتتفاجئش.. مصري!!