«فكة» السيسي تشغل رواد مواقع التواصل.. عاطف: «محافظ البنك المركزي طبع 30 مليار جنيه علشان أزمة الفكة».. أحمد: «ياريس مرتباتنا كلها فكة».. عمر: «رئيسي وهديله كل حاجة».. معاذ: «بناخد بالباقي لبان»

أثارت مطالبة الرئيس عبد الفتاح السيسي المصريين بأن يمنحوا البلد "فكة" مرتباتهم، بعدما قال "سيبولي فكة مرتباتكم أنا عايزها نفيد بيها البلد"، انتباه نشطاء مواقع التواصل الاجتماعي "فيس بوك وتويتر".

وتفاعل النشطاء مع ما قاله الرئيس، فأكد بعضهم أن الرواتب لا تتعدى كونها "فكة"، في حين قال البعض الآخر إن "الفكة" حاليًا لا توجد في السوق المصري، بينما أكد عدد من النشطاء أن الرئيس لو طلب أي شيء سيعطونه له لاحتياج البلد لذلك. 

أزمة الفكة
وقال عاطف: "طيب محافظ البنك المركزي طبع 30 مليار علشان أزمة الفكة... الناس تسيب 20 مليون جنيه فكة".

وأضاف محمد الفيومي: "سيبولي الفكة.. إذا الشعب يومًا أراد الحياة.. لابد أن يكون معه فكة".

وعلق تيجن بنها: "فكة إيه.. أنا بدفع للسواق جنيه ومبيرجعليش الربع جنيه بزعل قوى".

ورد العميل: "أحنا لو جمعنا حجم الرشاوي والإكراميات اللي بتتصرف في الحكومة مش هنحتاج فكة من أساسه"، وتابع أحمد عصام: "ياريس مرتباتنا كلها فكة".

"رئيسي وهديله"
وقال شريف فودة: "طيب بالنسبة للناس اللى مرتباتها فكة يعملوا إيه؟".

وأضاف عمر شرقاوي أحمد: "السيسي رئيسي.. هديله كل حاجة ممكنة.. مصر محتاجانا وهو أكيد هيقدر ده".

وعلق إبراهيم حسن مجدي: "أنا بسيب دايما فكة من المرتب بتاعي بتفضل في الفيزا.. ومكنة الـ ATM مبترضاش تطلعهم.. أي خدمة يا مصر".

ورد إسلام مسلم: "مرتب المواطن كله على بعضه أصلا فكة".

وتابع محمد عبد الوهاب: "إيه يعنى شوية فكة من اللى معاكم مش هتأثر يعنى".

ماكينة الفيزا
وقال معاذ: "مفيش فكة في مصر وبناخد بالباقي لبان"، وأضاف أحمد حسني: "ماكينة الفيزا مش بتطلع أقل من ٢٠ جنيه وماحدش بياخد فكة أصلا".

وعلق محمود جمال: "لو سمحتوا يا جماعة نفهم نظرية سيادة الرئيس قبل ما نهاجم.. نظرية سيبولي فكة مرتباتكم دي مش جديدة ومش أول مرة حد يطبقها.. النظرية نجحت جدا في التسعينات وفكة على فكة كونت أسطورة.. اقرأوا التاريخ قبل ما تتريقوا".

وتابعت مي حامد سليمان: "من شهور وATM أقل فئة فيها 20 جنيه وأحيانا كتير 50 جنيه.. يعني كل المرتبات والمعاشات اللي بتتقبض عن طريق الصرف الآلي أصحابها ما بيقدروش يسحبوا اللي أقل من 20 جنيه وساعات 50 والمبالغ دي على أيامنا كانت فلوس مجمدة أيام ما كانت الفكة قروش مش جنيهات".

"ما تغلاش عليك"
وقال حسام المتيم: "أنا طول عمري بسيب الفكة اللي في جيبي للأولاد، معلش يا ولاد سامحوني أنا بعد كده هسيب الفكة لمصر"، وأضاف أيمن مصطفى: "يا جماعة ياريت كل مصرى من هنا ورايح يخلى معاه فكة".

وعلقت أمل إبراهيم: "إمبارح نزلت أشترى حاجات وبحاسب ماخدتش الباقى عشان مفيش فكة.. النهاردة في المحكمة رحت أعمل ورق، ساعة أو أكتر في الخزينة عشان أدفع جنيه ونص وطوابير واقفة لنفس السبب وورق وإيصالات وبرضه مفيش فكة.. السوبر ماركت بيدى بالباقى لبان أو بونبونى أو برطمان مربى صغير... وبعدين السيسي بيقول أنا عاوز الفلوس الفكة.. والله ماتغلى عليك بس هي فين".