بالصور.. حكاية مقتل مشجع بعد انتهاء مباراة مصر والكاميرون.. مدير مقهى وعماله يعتدون عليه بمصر الجديدة.. مشاجرة على «الحساب» السبب.. وشهود عياد: قتلوه بـ«ماشة الشيشة»

لم يكن الشاب محمود بيومي يدرك أن أمس وبعد انتهاء مباراة مصر والكاميرون سيشهد نهايته على يد أحد العمال بمطعم "Keif" بشارع النزهة بمصر الجديدة.

حب المنتخب
كان الحماس يملأ قلب الشاب محمود بيومي، فقرر أن يصطحب خطيبته لمشاهدة مباراة مصر والكاميرون، أمس الأحد، في نهائي كأس الأمم الأفريقية، وكان قرار محمود أن يشاهد المباراة في مطعم "Keif" بشارع النزهة بمصر الجديدة، لكن تأتي الرياح بما لا تشتهي السفن وتغلب الفريق الكاميروني على المنتخب.

قتل محمود
فور انتهاء المباراة أغلق صاحب المطعم أبوابه على زبائنه وبعد أن أخذ الحساب من محمود قام أحد العمال بقتله.

حكاية مقتل محمود بالمطعم تسردها هبة رشاد في تدوينة على صفحة "مصر الجديدة" بفيس بوك، فقالت "مطعم Keif في شارع النزهة اللي في مصر الجديدة، بيضايقوا الناس بعد الماتش وقفلوا الباب وقالوا محدش هيخرج إلا لما نحاسب كل الناس، قام شاب معاه خطيبته قال أنا عايز أحاسب وأمشي وشد مع شوية العمال".

وقالت هبة: "جاء مدير المكان قال حساب الترابيزة دي معايا وهو بيحاسبه حصل مشادة بينه وبين مدير المكان بسبب أن الولد بيقوله اللي بتعملوه ده بلطجة، قاله مش أنت بتعلي صوتك هتشوف البلطجة بجد، وأول ما خرجوا من الكافيه ضربوه بكرسي على ضهره وطعنوه طعنتين بسكينه شفتهم بعيني واحدة بالرئة وواحدة في بطنه.. اتنقل الولد لمستشفى فلسطين ومنها على كليوبترا ومات في كليوبترا.. الشاب إلى أتقتل اسمه محمود بيومي، واحد راح يتفرج على الماتش في مكان رجع لأهله ميت"، وطالبت بإغلاق المطعم والقصاص من قتلة محمود بيومي.

شهادة صديقه
وقال محمد طارق وهدان، أحد أصدقاء محمود بيومي: "أنا صاحبي اتقتل إمبارح، واللي حصل أنه كان في كافية Keif في مصر الجديدة، بعد الماتش ما خلص قفلوا الباب على الناس وقالوا ما حدش هيمشي غير ما كله يحاسب، شاب وخطيبته قاموا يحاسبوا ويمشوا، وطبعًا بيقولهم إزاي تقفلوا الباب علينا، حصل مشادة بينه وبين طاقم العمل "staff" جاء مدير المكان وحاسبه ونزل رجالته قدام المكان ضربوه بكرسي حديد على ظهره، وطعنوه في بطنه بـ"ماشة الشيشة".. هو إيه اللي بيحصل في البلد".

يستعد للزفاف
حالة من الغضب الشديد انتابت أهالي ضاحية مصر الجديدة لمقتل الشاب، فقالت رنا البحيري: "لا تعليم ولا أدب موجود في البلد دى ممكن أختى أو أخوك يكون مكان الولد كل الل عمله هو أنه رفض الطريقة الهمجية دى راح يتفرج مع خطيبته مرجعش البيت ومات! مات".

وطالبت مريم أحمد بمعاقبة صاحب المطعم فقالت: "حسبنا الله ونعم الوكيل فيهم بس المقاطعه مش الحل الحل عند الشرطة والقضاء لازم يكون فيه حكم رادع وقوي جدا للبلطجية سواء صاحب الكافي أو العمال اللى بيشتغلوا معاه في البلطجه وإنا لله وإنا إليه راجعون".

ورد خالد عبد الحميد:"حملة مقاطعة للكافيه دي متنفعش لو ده حصل فعلا يبقي الكافيه ده لازم يتكسر على دماغ صاحبه والبلطجية اللي معاه".

وعلقت هويدا لبيب: "أصلًا الكافيه ده بتاع واحد مغنى من بتوع أراب أيدول أو جود تلنت حاجة كده ومش مصرى المفروض يتاخذوا معاه إجراء قوى".

صفحة محمود بيومي على فيس بوك تؤكد في التعريف أنه يعمل مستشارا في شركة بيت نتورك ريـال ستيت "Beit Network - Real Estate"، وكان يعمل مدير إعلام بإحدى شركات السياحة، ويهتم بالرياضة وتشجيع المنتخب القومي.

في شهر يوليو 2016 كان محمد بيومي في حالة غامرة من السعادة لخطبته لسالي محمد حجازي، لكن فرحته اختطفت بعد 6 أشهر من الخطبة، حيث كان بيومي يستعد لزفافه.

تحقيقات النيابة
وتباشر اليوم الإثنين، نيابة شرق القاهرة الكلية برئاسة المستشار إبراهيم صالح المحامى العام الأول التحقيق في واقعة مقتل شاب على يد عدد من البودى جاردات بكافيه في منطقة النزهة لخلافهم مع مدير الكافيه حول الحساب، وذلك عقب انتهاء مباراة مصر والكاميرون أمس الأحد، وأمرت بتشريح الجثة وسرعة إجراء تحريات المباحث حول الواقعة.

تبين من مناظرة النيابة لجثة المجني عليه أنها لشاب يدعى "محمود.ب"، في منتصف العقد الثانى من العمر، وتوفى نتيجة إصابته بطعنتين بالرئة والبطن.

بداية الواقعة
تلقت مباحث قسم شرطة النزهة بلاغا بنشوب مشاجرة بين شاب وعدد من البودى جاردات بأحد الكافيهات.

وعلى الفور انتقلت قوة من مباحث القسم وتبين صحة البلاغ بسبب خلافات بين المجنى عليه ومدير الكافيه على الحساب عقب انتهاء مباراة مصر والكاميرون، وتم نقل الجثة للمستشفى، وتحرر المحضر اللازم، وتولت النيابة العامة التحقيقات.