معلمة تقترح تنظيم حملة «تمرد» لرفع رواتب المدرسين
اقترحت معلمة، عبر جروب واتس آب محبي الدكتور طارق شوقي، تنظيم حملة لجمع توقيعات المعلمين من أجل رفع رواتب المعلمين لتتواكب مع غلاء الأسعار، وذلك على غرار حملة تمرد.
وقالت المعلمة: "أنا مدرسة معايا ليسانس آداب قسم لغة فرنسية وبقبض 1200 جنيه، وأنا أم لطفلين لظروف معينة أنا متولية مسئوليتهما، طفل في كي جي 1 وطفل عنده ٧ شهور".
وأضافت: " أنا مش هتكلم على المبلغ اللي الطفلين دول محتاجينه عشان يعيشوا عيشة طبيعية، مش هقول زي ابن وكيل نيابة أو زي ولاد موظف في بنك أو في الكهرباء، بس انا اتعلمت واخدت مؤهل عالي واشتغلت مدرسة مش عشان اعيش مهانة واستنى مساعدة أهلي لأن 1200 جنيه دلوقتي مابقوش يكفوا مصاريف أسبوعين أكل وشرب بس لا هشتري لبس ولا هكشف على ولد منهم في الأسبوعين".
وقالت: "عشان كده انا فكرت في حاجة وياريت كل زمايلي المعلمين في مصر يساعدوني نصرخ وندور على حقنا بس نبقي زي وكيل النيابة أو زي فني معاه دبلوم في الكهرباء وبياخد 4000 جنيه، ففكرت نعمل حركة زي حركة تمرد اللي قلبت الدنيا وياريتها ماكانت اتقلبت.. نعمل حركة وقولت هسميها صرخة معلم يمكن توصل للرئيس ويحس بالمعاناة اللي احنا عايشين فيها ومابيضعش حق وراه مطالب لكن طول محنا بنستنا العشرة جنيه اللي بتزيد على المرتب وبنبقى مبسوطين بيها عمر ماحد هيحس بينا اللي موافقني نجيب حقنا ونصرخ باعلي صوت يقول انا ونوصل صرختنا".
