10 حاجات ممكن تعملها وانت «سينجل» في الفلانتين
اليوم الأحمر بكرا اللي هتصحى فيه من النوم تلاقي الدنيا كلها أحمر في أحمر كل المحلات بقدرة قادر بقت بتبيع ورد ودباديب حمرا، كل الناس في الشارع ماشية ولابسة أحمر، هتصيبك حالة من الاشمئزاز لكن متحاولش تضايق نفسك كـ«سنجل» هنقولك شوية حاجات تعملها عشان متضايقش يوم «الفلانتين».
1- أول حاجة أبعد عن كتابة أي بوست على «فيس بوك» من نوعية سنجل وافتخر، أو من نوعية أنا جيبتلي ورد وفرحتني وبسطتني وخرجتني وأكلتني وشربتني، لأنك بالطريقة دي بتدي فرصة للأخوة المرتبطين أنهم يتريقوا عليك ومش بعيد واحد أو واحدة صاحبتك يدخل يحطلك كومنت من نوعية يا عيني محروم ويجيب أجلك من أول بوست.
2- لما حد من صحابك تقيل يسيب الناس كلها ويدخل ياخد رأيك أنت تحديدًا في الهدية اللي هيجيبها لحبيبه، تجاهله ويفضل متردش عليه.
3- يفضل أنك تغض بصرك في اليوم ده عن كل حاجة ومتتعرضش للون الأحمر كتير وتجنب أنك تفضل باصص عالناس اللي ماشية وعلى محلات الورد والدباديب صدقني هتضايق ومش بعيد تكره اللون الأحمر وهو لون لطيف فا بلاش تخسره.
4- فكر تتخلى عن البني ادمين في اليوم ده وتصاحب كائن جديد وليكن أنزل اشتري كلب أو قطة وأخلق حالة من الانسجام النفسي بينك وبينهم عشان تخرج من العزلة اللي انت فيها.
5- ممكن تستغل اليوم ده في التفكير في حلول علمية لبعض المشكلات المستعصية في حياتك على سبيل المثال لا الحصر القضاء على القمامة في شوارع مصر، أو كيف تتعلم الإنجليزية في 3 أيام ونص، وصدقني اليوم هيخلص بسرعة وهتلاقي نفسك طلعت بأفكار لولبية عظيمة وممكن تشكل فريق عمل مع صحابك السناجل وتعملوا عصف ذهني.
6- بلاش تعيد وتزيد إن موضوع الارتباط ده مش فارق معاك ومش بتفكر في الموضوع ده عشان ده في حد ذاته أكبر اثبات منك انك هتموت وترتبط.
7- انزل عند بياع الورد وادخل عليه بقلب جامد اسأله عن أنواع الورد اللي عنده وعن سعر كل وردة لوحدها وايه الفرق بين الوردة دي والوردة دي وبعد ما يجاوب على أسئلتك المستفزة كلها ويبدأ دخان رمادي يخرج من ودانه من النرفزة ، قوله شكرا انا بس كنت باخد فكرة عشان لما أرتبط وسيبه وأمشي بسرعة قبل ما أي رد فعل غبي منه.
8- لو بنت كلمي واحدة صاحبتك سينجل وقاعدة متنكدة انها مش هيجيلها هدية وواسيها، ولو انت ولد كلم واحد صاحبك وانزلو اقعدوا عالقهوة اتريقوا عالناس.
9- ابعد عن الفرجة على الأفلام الرومانسية اللي هتلاقيها مغرقة التليفزيون في اليوم ده مش مفيدة لحالتك ممكن تتفرج على أفلام رعب هتكون مناسبة أكتر.
10- انزل اتمشى عالكورنيش أو اي مكان ماللي بيقعد فيه الحبيبة وأختار اتنين مرتبطين يكونوا منسجمين مع بعض أوي وروح أقعد جنبهم ولما يزهقوا منك ويقوموا يمشوا كرر الموضوع مع كل اتنين قاعدين مع بعض حواليك وبكده تبقا كسرت وحدتك وهتروح سعيد واكتب عالفيس بوك انا قضيت عيد حب عظيم مع ناس عظيمة بدون ذكر انت عملت ايه.
