محمود كهربا يوجه رسالة خاصة إلى جماهير الأهلي والزمالك

حرص محمود عبد المنعم كهربا لاعب النادي الأهلي ومنتخب مصر لكرة القدم على توجيه رسالة خاصة لـ جماهير الأهلي والزمالك وجماهير الكرة المصرية بشكل عام قبل انطلاق منافسات بطولة أمم إفريقيا والمقرر إقامتها في كوت ديفوار خلال شهر يناير الجاري.

تصريحات كهربا

وقال محمود كهربا في تصريحات تلفزيونية: زيارة الرئيس السيسي لـ معسكر منتخب مصر شرف كبير جدا، وبنشكره على دعمه لينا وبحضوره لـ المعسكر، والكورة فيها مكسب وخسارة، ولكن تركيزنا حاليا على تحقيق بطولة أمم إفريقيا

وتابع: إحنا دلوقتي مع منتخب مصر، عايزين ننسي موضوع الأندية، عايزين الجمهور يدعم لاعيبة المنتخب وبس.

و أضاف كهربا: في حاجات كتير مش واصلة للجمهور، إحنا بنقعد مع بعض في معسكر المنتخب وبناكل ونشرب مع بعض، إحنا مع الأندية في الـ 90 دقيقة بنموت نفسنا وبندافع عن فريقنا، بس إحنا بعد الـ 90 دقيقة بنبقى أصحاب وإخوة وده اللي لازم الجمهور يفهمه، وبجد لازم نلغي حوار التعصب ده، الموضوع صعب أوي.

وأتم كهربا تصريحاته قائلا: دي رسالتي لـ الجماهير كلها، إحنا دلوقتي مع منتخب مصر، وعايزين الجمهور يبقى في ضهرنا، وتنسوا أي خلافات مع أي لاعب، شجعوا منتخب مصر.

مجموعة مصر في أمم إفريقيا

ويتواجد منتخب مصر لكرة القدم بقيادة المدير الفني روي فيتوريا في بطولة أمم إفريقيا في المجموعة الثانية، والتي تضم منتخبات موزمبيق وغانا والرأس الأخضر.