بشرى عن الهجوم على مسلسل ”سيد الناس”: لو اتفقت الأذواق هتبور السلع
أكدت الفنانة بشرى أن أي عمل فني، يكون عليه جدال واختلاف في الآراء حوله، كما أشادت بالمخرج محمد سامي، واصفة أياه بأنه يحترم المحترم ويقدر الشاطر.
وقالت بشرى في لقاء مع ET بالعربي: "هو في مسلسل مش عليه جدل ولا انتقاد ولا هجوم لو اتفقت الأذواق هتبور السلع، مفيش مسلسل لمحمد سامي مش عليه جدل، أنا مليش دعوة بحالة الجدل أنا ليا اللي قدامي بيبسطني بالعمل ولا لأ أنا مشدودة ولا لأ قفلة الحلقات بتشجعني أشوف الحلقة اللي بعدها ولا لأ، إنما الكلام الكتير دي بقيت سياسة السوشيال ميديا في أي حاجة، مبقتش فارقة بالنسبالي اللي يهمني العمل وردود أفعال الناس العادية الطبيعية اللي في الشارع".
وقالت بشرى عن تعاونها لأول مرة مع المخرج محمد سامي: "المخرج محمد سامي دايما عليه حالة جدل مستمرة حبيت استكشف هل الجدل دا على حق ولا لأ، لقيت أن هو راجل بيحب شغله أوي ودقيق جدا ولما بيتضايق بيبقى عشان في استهتار أو في ناس مش ملتزمة ومش دقيقة، لكن هو بيحترم المحترم وبيقدر الشاطر جدا والمستهتر أو اللي محتاج أنه يركز أكتر هو اللي بيتكلم معاه".
وعن تشبيه البعض مسلسل "جعفر العمدة" بمسلسل "سيد الناس" قالت بشرى: "أنا متفرجتش على "جعفر العمدة"، وقتها مكنتش في مصر ومتفرجتش عليه فمقدرش أقارنه بمسلسل "سيد الناس" خصوصا وأنا شغاله فيه فشهادتي مجروحة في كل الأحوال".
