شوبير: هناك حملة على توروب.. والأهلي يدفع راتب 3 مدربين
تحدث الإعلامي أحمد شوبير نجم الكرة المصرية السابق، عن الهجوم الذي يتعرض له الدنماركي ييس توروب المدير الفني للفريق الأول لكرة القدم بالنادي الأهلي.
تصريحات شوبير عن ييس توروب
وقال أحمد شوبير في تصريحات إذاعية: أشعر وأشم رائحة في ملف ييس توروب مدرب الأهلي، ونفس الفيلم اللي اتعمل على كولر وعلى ريبييرو بيتعمل دلوقتي على توروب، ومجرد إحساس يعني وأتمنى إن يكون إحساس خاطئ.. هو القصص دي بتطلع منين يعني فين وليه وإيه الموضوع؟
وأضاف شوبير: يعني هو حضرتك إيه طلباتك؟ تمشّي توروب حاضر أوكي حالا، وبعدين يجيب مين الأهلي؟، ويجيب مدرب عالمي؟ حاضر عينينا الاتنين. وبعدين هيخسر ماتشين، وطب وبعدين؟.
وأضاف أحمد شوبير: هو في إيه؟ هو مركز شباب ده؟ ده النادي الأهلي ومش كلمتين وكل حد يطلع يقول وكل واحد يكتب فأنت تتخض وتقوم جاي ممشي المدرب.
وأردف شوبير: الأهلي بيدفع مرتب 3 مدربين عشان تبقوا عارفين! بيدفع مرتب كولر، بيدفع مرتب ريبييرو، بيدفع مرتب توروب.. بوضوح شديد، وبعدين هو إنت إيه؟ مانشستر يونايتد؟ كل شوية هتمشي مدرب وتدفع؟ هو في إيه؟ إيه الحدوتة؟ إيه القصة يعني؟.
وأكمل شوبير: من فترة كانت الحملة على وليد صلاح، فهديت شوية على وليد صلاح، وامسك توروب دلوقتي، والبعض يتحدث عن الفريق وتعادله، إيه المشكلة، مش هتكسب كل الماتشات ومش هتكسب كل البطولات.
واختتم شوبير: هي إيه الحملات دي بتطلع منين دي وسببها إيه؟ أنا الحقيقة مش عارف، ولو عارف هأقول مش هتفرق معايا، ومش هتفرق معايا القصة لا من قريب ولا من بعيد، بس اهدوا شوية.
