لما جبريل عن انتشار عمليات التجميل: كانت مقتصرة على الأغنياء.. ودلوقتي البوتكس والفيلر بالتقسيط

علقت الإعلامية لما جبريل على انتشار إجراء عمليات التجميل بين جميع الطبقات، على عكس السنوات السابقة كانت تقتصر على طبقة الأغنياء فقط.

لما جبريل تتحدث عن انتشار عمليات التجميل

وقالت لما جبريل خلال فقرتها ببرنامج"الحكاية" التي تقدمها مع الإعلامي عمرو أديب: "عمليات التجميل زمان كانت مقفولة على الطبقة الغنية جداً أو الفنانين اللي الأضواء بتفرض عليهم ده.. النهاردة بقى عمليات التجميل بقت بالتقسيط.. الفيلر، البوتوكس، ونحت الوسط بقوا على الفيزا".

وتابعت لما جبريل: "واضح كده إن السوشيال ميديا مش بس حطت لنا معايير جمال مشوهة ومحفوظة لملامحنا وجسمنا.. لا دي كمان عملت حالة من عدم الرضا.. فالناس مستكفتش بالفلاتر اللي بتحطها على كل صورها..لا .. بقوا يروحوا يعملوا عمليات تجميل بالقسط ..ونحت في جسم لحد مايبقى مقاس الوسط 5 سم".

وأضافت لما جبريل: "التجميل انتشر في دواير أوسع بكتير من مجرد ناس معاها فلوس.. لدرجة أن سوق التجميل والعناية الشخصية عندنا في مصر لوحده وصل لـ 2 مليار دولار في 2025 ..ومصر بتحتل المرتبة الأولى في وجود عدد جراحي التجميل المعتمدين".

واستكملت : "عاوزة أقول أن كل البنات حلوة بملامحها الطبيعية اللي ربنا خلقها بيها.. والحاجات التجميلية دي المفروض تكون للضرورة الطبية أو لعيوب واضحة.. مش موضة بنجري وراها بالديون وأقساط البنوك عشان نطلع شبه بعض في الآخر بصورة "كوبي بيست".. فكري في أولوياتك صح.. لأن راحتك النفسية وقيمتك مش في كمية الفيلر اللي بتحقنيها.. ولا في نحت على 12 شهر بدون فوايد".

يذكر أن الإعلامية لما جبريل تقدم فقرة متخصصة في التريندات ببرنامج "الحكاية" مع الإعلامي عمرو أديب عبر قناة "إم بي سي مصر"، أسبوعيًا يومي الأحد والإثنين، وتتناول من خلالها ما يحدث على السوشيال ميديا، طوال الأسبوع وكيف يتفاعل معها الجمهور.